邓丽欣（Stephy）今日（15号）快乐生辰，前日Fans Club特别为她筹办生日会，与逾百fans切蛋糕、唱生日歌、玩游戏、分享追星点滴，非常热闹。Stephy更率先宣布明年三月红馆举行首次个人演唱会作为「回礼」，她与fans齐齐感动落泪。
Stephy台上说：「我有一份礼物送俾大家，但呢份礼物今日攞唔到住，几时攞呢？我约定你哋，明年三月⋯⋯」此时她眼泛泪光，有fans似乎猜到报以欢呼声，她掩嘴点头示意猜对了，全场掌声。冷静几秒后，她续说：「明年三月红馆见！」台下fans立即兴奋欢呼，有不少感动抹眼泪。Stephy说：「我嘅生日愿望真係好简单，希望大家以最开心、最健康嘅身体嚟睇我嘅演唱会，嗌大声啲！」全场尖叫。
之后Stephy接受访问笑言以为会忍得住眼泪，结果还是失守，她说：「其实咁多年无论任何嘅歌迷聚会我都会喊，今年以为自己劲咗，点知都係忍唔住。我觉得好感动，尤其是望住咁多位好熟悉嘅面孔，支持咗我咁多年，我觉得呢一个回馈对于佢哋、对于我自己都係好重要。希望大家得到呢份礼物觉得开心，希望所有fans都买到飞入场，真係好开心，约定大家红馆见。」
台下有fans跟住喊，Stephy说：「佢哋可能都谂『终于等到呢一日啦』，见到佢哋开心和感动，对我嚟讲真係好重要，令我更加努力去做好呢个演唱会，唔好令佢哋失望。」
Stephy 19岁出道，不少fans都支持她接近十几年，其实她在生日会fans分享环节，听到他们的追星故事和见到他们的珍藏品已经好感动，不时见她眼红红强忍眼泪。她说：「佢哋好多人都支持咗我十几年，而我好细个入行，佔咗我人生超过一半时间，全部都同大家一齐渡过。呢啲经历得来不易，好值得珍惜。」有fans表示因Stephy而找到自己的人生目标、事业、爱情，甚至改善与家人关係。
「相隔咗几年冇办生日会，再庆祝好开心，今日好多人嚟咗，有跟咗我好多年嘅歌迷，亦都有新脸孔，非常多谢大家参与。个蛋糕好靓，好有心思。咁多年来收咗好多fans嘅礼物，我送返俾佢哋嘅礼物，除咗係我嘅努力和进步，都谂唔到送乜嘢更加好，所以就趁一个咁好嘅时机同大家宣布，我相信对佢哋嚟讲係最好嘅礼物，就係我明年红馆演唱会。」
Stephy收到很多fans手造的生日礼物，特别开心。她说：「礼物不在乎价钱，最紧要係佢哋嘅心意，所以好多年之前佢哋已经开始会亲手整礼物俾我。今年Fans Club忡特别整咗一部扭卡机，所有扭卡得到嘅钱都捐去慈善机构。呢份礼物对我嚟讲係最好，见大家排晒长龙，多谢大家落力参与。」Stephy更放入几十张亲笔签名隐藏版给fans惊喜。
