台积电ADR股价最近突破190美元以上历史新高，主因係上星期公布嘅今年第三季总收入达到约236亿美元，同比增长39%，高于市场预期。同时，令近期巿场对下游科技巨企AI芯片需求放缓忧虑大大消除。
下载Yahoo财经APP
美股外币即时报价 多国新闻任睇
竞争对手陷入业务危机与此同时，主要芯片代工竞争对手Intel 陷入业务危机，代工业务出现重大亏损，需要裁员以及停派股息；而三星亦都喺最近业绩做得比预期要差，管理层要向投资者道歉。
而最重要嘅係，无论下游科技巨企对于AI发展竞争如何激烈、Nvidia同AMD嘅GPU点样抢生意都好，或者係科技巨起自研AI芯片，所有最先进AI芯片嘅代工生意几乎都係要搵台积电去生产。即係下游嘅竞争格局点样变化，佢嘅生意都係咁稳地增长。
智能手机板块需求逊预期台积电最新季度收入超出市场预期，最主要係来自HPC高性能运算、数据中心嘅芯片客户需求；但同一时间，要留意嘅係最近多名分析师都有发表意见，认为苹果嘅iPhone 16人工智能元素冇想像中咁丰富，都係以唧牙膏方式推出，令到需求无预期咁高。而智能手机芯片业务佔台积电超过30%收入，呢一个板块嘅相对疲弱都对台积电中期嘅收入增长造成一个潜在嘅负面影响。
而台积电近一年开始布局未来几年喺海外设厂：日本熊本设厂做工业芯片、欧洲设厂做汽车芯片、美国亚利桑那州设厂，喺美国芯片法案资助下做最先进AI芯片。但谂深一层，呢种超出纯商业考量、多地区、大规模海外建厂，长远嚟讲好大机会造成供应过剩嘅问题。
因为众所周知半导体行业係一个周期性行业。新一代芯片需求往往喺短期内会高速增长，令现有产能设施唔能够满足市场需求，导致中期销售增长强劲甚至因为供应紧张而推高利润率（正正係现时嘅市场情况）。
于是芯片生产商会计划建设新厂房，满足急速增长嘅需求。但建设新厂房需要数年时间，而且因为竞争关係，新增产能往往超出市场未来数年嘅整体需求。到新厂房建成、扩大嘅产能供应到位时，下游需求可能已经增长放缓，唔能够消化总体新增嘅供应量。
而呢一刻台积电建海外建厂扩充产能嘅计划，更係喺商业因素以外添加地缘政治考量因素，即係实际新增产能可能远高于未来嘅市场需求，令呢种周期性行业供应过剩嘅风险额外增加。
Benny Yam
执业会计师
Patreon
本栏隔周三刊出
热门新闻
